Steinshús: Heiðarlegur matur sem svíkur engan

Skrifað af:

Ólafur Sveinn Guðmundsson

Aðalbjörg Hrafnsdóttir í Steinshúsi. Mynd: Ólafur Sveinn Guðmundsson

Matreiðslumeistarinn Ólafur Sveinn Guðmundsson heimsótti Steinshús á Langadalsströnd. Steinshús er safn til minningar um skáldið Stein Steinarr en þar eru einnig íbúðir til leigu og notalegt kaffihús þar sem haldnir eru ýmisir menningarviðburðir á sumrin. Strandir.is fékk leyfi til að birta grein Ólafs Sveins um heimsóknina.

Stundum verður maður bæði undrandi og glaður þegar maður er á ferð og dettur niður á gullmola þar sem alls ekki er von, en það gerðist fyrir mig hér um daginn.

Ég var að þvælast fyrir vestan nú fyrir stuttu og ætlaði út að jökli (Drangajökli) en ég hafði heyrt um lítið kaffihús á Nautseyrinni sem er í leiðinni og þangað ætlaði ég fyrst.

Nauteyri er innst í Ísafjarðardjúpi, á Langadalsströnd. Þegar keyrt er að sunnan og búið að aka í gegnum Hólmavík og yfir Steingrímsfjarðarheiði, er komið að Steinshúsi skömmu eftir fyrstu beygju til hægri af þjóðveginum.

Kaffistofan í Steinshúsi. Mynd: Ólafur Sveinn Guðmundsson

Í Steinshúsi getur að líta sýningu um skáldið Stein Steinar í máli og myndum og í sama húsnæði er rekið kaffihús og veitingasala þar sem opið er frá klukkan 10 til 20 alla daga vikunnar að minnsta kosti út ágúst.

Hér ræður ríkjum hún Aðalbjörg Hrafnsdóttir eða Abba eins og ég þekki hana en ég veit að hún er bæði listakokkur og elskar að baka.

Abba er eins og ég sagði magnaður bakari og hér eru því í boði frábærar heimalagaðar kökur ásamt yndislega góðu rúgbrauði með silung neðan af Tálknafirði eða heiðarlegt síldarbrauð sem er ekki á hverju strái lengur.

Auk þess er boðið upp á vöfflur með rjóma og ég veit að núna um Verslunarmannahelgina verður hún með sprengiverð á vöfflunum enda eru margir sem eiga eftir að leggja leið sína á Nautseyrina.

Enn fremur er frábær kjúklingasúpa í Steinshúsi sem er afar vinsæl hjá ferðahópum og einstaklingum sem eiga leið um. En það get ég fullyrt að súpan svíkur ekki neinn og er þess virði að prófa ef komið er við.

Kjúklingasúpan í Steinshúsi svíkur engan. Mynd: Ólafur Sveinn Guðmundsson

Þegar að er gáð eru margar góðar ástæður til að gera stans hjá Steinshúsi þegar ekið er um héraðið, fyrir utan afar merkilega sýningu og fádæma gott kaffi í sveitasælunni:

„Fólk getur setið hér á veröndinni og fylgst með hvölunum í Djúpinu leika sér á meðan það drekkur kaffið, og svo stingur haförn sér niður eftir æti. Ferðalangar eru ekki síst hrifnir af þessu svæði, þeir halda örlítið lengra og fara inn í Kaldalón, þar sem Drangajökull skríður fram,“ segir Abba.

Í Steinshúsi eru stundum haldnir tónleikar og skáld stíga gjarnan á svið og lesa upp eftirlætisljóð sín eftir Stein og eigin verk. Dagskráin er auglýst á Facebook-síðu staðarins, Steinshús.

Aðalbjörg Hrafnsdóttir, Abba. Mynd: Ólafur Sveinn Guðmundsson

Ég mæli eindregið með viðkomu í Steinshúsi en Steinn Steinar var þegar upp er staðið áhugaverður einstaklingur og skáld. Ekki skaða veitingarnar hennar Öbbu heldur og verðið er mönnum sæmandi.

Lifið heil.

Upprunalegu færslu Ólafs Sveins er hægt að skoða hér: Á ferð um Djúpið

Share on facebook
Share on twitter
Share on pinterest
Share on email

Þín auglýsing hér?

Hafðu samband
auglysingar@strandir.is

Mest lesið í vikunni

Nýjustu fréttir og greinar

Nemendur Grunnskólans á Drangsnesi seldu uppskeru sína úr skólagróðurhúsinu til að safna fyrir skólaferðalagi næsta vor.
Sigurlaug Gísladóttir, oddviti Frjálslynda lýðræðisflokksins í Norðvesturkjördæmi mætti í Strandavarpið og ræddi við Sigurð Líndal.
Guðmundur Gunnarsson, oddviti Viðreisnar í Norðvesturkjördæmi mætti í Strandavarpið og ræddi við Sigurð Líndal.
Hafgustur ehf, ný útgerð á Hólmavík, hlaut þriggja milljóna króna styrk úr Matvælasjóði til veiða og fullvinnslu á grjótkrabba.
Eyjólfur Ármannsson, oddviti Flokks fólksins í Norðvesturkjördæmi mætti í Strandavarpið og ræddi við Skúla Gautason.

Aðrar fréttir

Nemendur Grunnskólans á Drangsnesi seldu uppskeru sína úr skólagróðurhúsinu til að safna fyrir skólaferðalagi næsta vor.
Sigurlaug Gísladóttir, oddviti Frjálslynda lýðræðisflokksins í Norðvesturkjördæmi mætti í Strandavarpið og ræddi við Sigurð Líndal.
Guðmundur Gunnarsson, oddviti Viðreisnar í Norðvesturkjördæmi mætti í Strandavarpið og ræddi við Sigurð Líndal.
Hafgustur ehf, ný útgerð á Hólmavík, hlaut þriggja milljóna króna styrk úr Matvælasjóði til veiða og fullvinnslu á grjótkrabba.