vetur á Ströndum, Kirkjuból við Steingrímsfjörð

Veturinn á Ströndum ...

... er ógleymanlegur þeim sem hefur af honum náin kynni. Eða er kannski ekki eftirminnilegt ævintýr að festa farskjótann í skafli norður á Ströndum og komast hvorki lönd né strönd? Reyndar er þjóðleiðin að Kirkjubóli suður Strandasýslu mokuð af Vegagerðinni sex daga vikunnar svo það er tiltölulega lítil hætta á að menn geti notið þess lengi að vera veðurtepptir. En það er oftast hægt að finna skafl til að glíma við. Og að kvöldlagi í stjörnubjörtu veðri þegar norðurljósin leika sér á himninum er það gaman.

Börnin myndu örugglega skemmta sér vel ...

... í helgarferð norður á Strandir að vetrarlagi. Slík reisa væri tilbreyting sem talandi er um. Smá frí frá daglega amstrinu, skólanum og rútínunni í fjölskyldulífinu. Yfirleitt er nægur snjór til að hnoða snjókarl, grafa snjóhús og göng, renna sér á þotu og skreppa á gönguskíði.

Fyrir gönguskíðamenn ...

... er svæðið líka býsna skemmtilegt og yfir veturinn eru stundum mót fyrir skíðagöngugarpa á Ströndum. Fjölmargir heimamenn iðka þessa íþrótt og hafa gaman af.

Síaukinn fjöldi sækir í ...

... jeppa- og snjósleðaferðir norður á Strandir þegar líða tekur á vorið og ekki er annað að sjá en fólkið skemmti sér vel. Ef farið er með gát er svæðið heppilegt fyrir slík ævintýri og hægt að velja úr skemmtilegum leiðum.