|
Í tilefni af 112 deginum næstkomandi laugardag 11. febrúar, verður opið hús í Rósubúð, húsnæði Björgunarsveitarinnar Dagrenningar Hólmavík. Þar gefst áhugasömum kjörið tækifæri til að kynnast starfi sveitarinnar og tækjabúnaði. Kaffi verður á könnunni og rjómavöfflur á borðum. Sýndar verða myndir úr starfi og leik, nýjar sem gamlar. Á vef Dagrenningar kemur fram að björgunarsveitarmenn vonast til að sjá sem flesta á laugardaginn milli kl. 14 og 18. |
|
 |
|
Það var sjónarspil að sjá sólina bregða birtu á himin og haf í morgun. Svell voru víða á götum og vegum þegar birta tók, en svellbunkarnir hafa mikið látið á sjá í dag, enda hefur verið býsna hvasst og hiti. Fréttaritari strandir.is rölti með myndavélina um Hólmavík og tók ýmist myndir af svelli á götunum eða á móti sól eftir að hafa heimsótt leikskólann Lækjarbrekku í morgun, en þar var opið hús. |
|
Lesa meira...
|
Hið árlega þorrablót verður á Borðeyri laugardaginn 18. febrúar og hefst kl. 20:30 (húsið opnar kl. 19:30). Hljómsveitin Strákarnir okkar leikur fyrir dansi, Einar Georg sér um annálinn, Gæðakokkar um matinn og nefndin um skemmtiatriðin. Miðaverð er kr. 6.000 og 2.500 á dansleik (posi á staðnum). Miðapantanir þurfa að berast fyrir miðvikudagskvöldið 15. febrúar í síma 451-1176 eða 848-3852 (Rósa á Kolbeinsá), 564-2301 (Inga Hrönn á Kjörseyri) eða 451-1138 eða 862-8022 (Sirrý á Markhöfða).
|
|
Í tilefni af degi leikskólans mánudaginn 6. febrúar verður opið hús í leikskólanum Lækjarbrekku á Hólmavík þann dag frá kl. 9:00-12:00 og 14:00-16:00. Allir sem hafa áhuga á að koma og skoða leikskólann eru hjartanlega velkomnir í heimsókn. Í tilkynningu frá börnum og starfsfólki á Lækjarbrekku kemur fram að þau vonist til að sjá sem flesta mæta. Íbúar í Strandabyggð eru hvattir til að nýta sér þetta skemmtilega boð og kíkja í heimsókn á leikskólann næsta mánudag! |
|
|
Í dag var opið hús í leikskólanum Lækjarbrekku á Hólmavík, en tilefnið var að Dagur leikskólans var nú haldinn hátíðlegur í fimmta sinn. Sjötti febrúar er merkisdagur í íslenskri leikskólasögu, því þann dag árið 1950 stofnuðu frumkvöðlar leikskólakennara fyrstu samtök sín. Dagur leikskólans er samstarfsverkefni Félags leikskólakennara, Félags stjórnenda leikskóla, mennta- og menningarmálaráðuneytis, Sambands íslenskra sveitarfélaga og Heimilis og skóla. Tilgangurinn er að auka jákvæða umræðu um leikskóla, vekja umræðu um hlutverk leikskóla og starf leikskólakennara og kynna starfsemina. |
|
Lesa meira...
|
Fyrstu gestir í Skelinni, lista- og fræðimannaíbúð Þjóðfræðistofu á Hólmavík, á vormisseri 2012 verða með erindi um gróður og garðrækt á fimmtudagskvöldið 9. febrúar kl. 20:00. Erindið ber yfirskriftina Árin(n) í garðinum og er almennt spjall um gróður og garða, nær og fjær. Það er Heimir Björn Janusarson garðyrkjufræðingur og forstöðumaður Gufuneskirkjugarðs sem flytur erindið. Hann hefur sinnt trúnaðarstörfum fyrir bæði fagfélög garðyrkjunnar og stjórnvöld. Allir eru velkomnir í Skelina!
|
|
Í síðustu viku var hátíðleg stund á skrifstofu Strandabyggðar, en þá var skrifað undir styrktarsamning milli Félags eldri borgara í Strandasýslu og sveitarfélagsins Strandabyggðar. Meginmarkmið samningsins sem er til þriggja ára, er að styðja við þá mikilvægu og öflugu starfsemi sem fer fram allt árið um kring á vegum félagsins. Formaður Félags eldri borgara í Strandasýslu, Maríus Kárason, skrifaði undir samninginn fyrir hönd félagsins og Ingibjörg Valgeirsdóttir sveitarstjóri skrifaði undir fyrir hönd Strandabyggðar. Með þeim á myndinni er Arnar S. Jónsson tómstundafulltrúi Strandabyggðar sem undirbjó samninginn. |
|
Lesa meira...
|
| |
|
|
 |
|
